اَلشَّرَبُ [eş-şereb] (fethateynle) Susamak ma’nâsınadır; yukâlu: شَرِبَ الرَّجُلُ شَرَبًا مِنَ الْبَابِ الرَّابِعِ إِذَا عَطِشَ Ve bir kimsenin devesi za’îf ve zebûn olmak ma’nâsınadır; yukâlu: شَرِبَ الرَّجُلُ إِذَا ضَعُفَ بَعِيرُهُ Ve bir kimsenin devesi susuz olmak ma’nâsınadır; yukâlu: شَرِبَ الرَّجُلُ إِذَا عَطِشَتْ إِبِلُهُ Ve bir kimsenin devesi suya kanmak ma’nâsınadır; yukâlu: شَرِبَ الرَّجُلُ إِذَا رَوِيَتْ إِبِلُهُ Bu cihetle azdâddan olur.

اَلسَّرَبُ [es-sereb] (fethateynle) Vahşî cânver inine denir. Ve zîr-i zemînde kazılmış lağım ve izbe makûlesi yere denir. Ve hâne ve bâgçe içlerine su akacak künge denir. Ve şol cedîd kırba üzere dökülen suya denir ki kayışı ve sırımı ıslanıp dikiş yerleri müntefih olmakla derslerinden su neşf eylememek için dökerler. Ve akan suya denir. Esâs’ın beyânına göre kırbanın derzlerinden akan suya mahsûstur; yukâlu: سَالَ سَرَبُ الْقِرْبَةِ وَهُوَ الْمَاءُ الَّذِي يَقْطُرُ مِنْ خُرَزِهَا Ve Mahmûd b. ‘Abdullâh b. Ahmed el-Isbahânî ez-Zâhid el-Vâ’iz ve merkûmun kız karındaşı dav’ bint 'Abdullâh ve Mubeşşir b. Sa’d b. Mahmûd es-Serebiyyûn muhaddislerdir. Ve سَرَبٌ [sereb] Masdar olur, kırba ve matara makûlesinin derzlerinden su sızıp akmak ma’nâsına; yukâlu: سَرِبَتِ الْمَزَادَةُ سَرَبًا مِنَ الْبَابِ الرَّابِعِ إِذَا سَالَتْ