اَلرَّحَبَةُ [er-rahabet] (fetehâtla ve hâ’nın sükûnuyla lügattir) Bir mekânın fezâ ve meydânına denir, avlu ve sâhası gibi ki açık ve arsası vüs’atli yeri olacaktır, رَحَبَةُ الْمَسْجِدِ [rahabetu’l-mescid] ve رَحَبَةُ الدَّارِ [rahabetu’d-dâr] avlularıdır. Ve رَحَبَةُ الْوَادِي [rahabetu’l-vâdî] Çayın ve derenin suları aktığı akıntı yerleridir ki iki taraflı bayırlardan gelen sular oraya cereyân edip ve oradan akıp gider.

رَحَبَةُ الثُّمَامِ [rahabetu’s-sumâm] O nebâtın oyumuna ıtlâk olunur ki külliyyetli bittiği mahaldir. Ve ثُمَامٌ [sumâm] غُرَابٌ [gurâb] vezninde bir nebât-ı ma’rûftur. Ve رَحَبَةٌ [rahabet] Üzüm serecek yere denir, niteki hurmâ serecek yere جَرِينٌ [cerîn] derler. Ve vüs’atli çemen-zâr olan yere derler ki âyende ve revendenin ihtiyâr-ı nüzûl-gâhları ola. Cem’i رِحَابٌ [rihâb] gelir râ’nın kesriyle ve رَحَبٌ [rahab] gelir fethateynle ki cem’-i cinstir ve رَحَبَاتٌ [rahabât] gelir fetehâtla ve hâ’ların sükûnuyla da lügattir.

اَلرُّحْبَةُ [er-Ruhbet] (جُرْعَةٌ [cur’at] vezninde) Ece’ nâm cebelde bir su adıdır. Ve arz-ı Mekke’de zî zerevân nâm mahalde bir kuyu adıdır. Ve Huzeyl kabîlesi bilâdında Şemensîr nâm cebele mülâsık derede bir kuyu adıdır. Ve 'Irâk’ta kâdisiyye karşısında bir karyedir. Ve Yemen’de şehr-i San’â kurbünde bir deredir. Ve Medîne ile Şâm arasında Vâdi’l-kurâ kurbünde bir nâhiyedir. Ve Lecât nâhiyesinde bir mevzi’dir.

اَلرَّحَبَةُ [er-rehabet] (bi’l-fethateyn) Sâha ve fezâ ma’nâsınadır; yukâlu: هَذِهِ رَحَبَةُ الْمَسْجِدِ أَيْ سَاحَتُهُ Ya’nî mescidin önü. Cem’i اَلرَّحَبُ [er-rehab] ve اَلرَّحَبَاتُ [er-rehabât] ve اَلرِّحَابُ [er-rihâb] gelir, ûleyeynde fethateynle ve sâliste râ’nın kesriyle.

اَلرُّحْبَةُ [er-ruhbet] (râ’nın zammı ve hâ’nın sükûnuyla) ve اَلرَّحَابَةُ [er-rehâbet] (râ’nın ve hâ’nın fethiyle ظَرَافَةٌ [zarâfet] vezni üzere) Vâsi’ olmak; yukâlu: رَحُبَتْ تَرْحُبُ رُحْبًا وَرَحَابَةً مِنَ الْبَابِ الْخَامِسِ ve kavluhum مَرْحَبًا وَأَهْلًا أَيْ أَتَيْتَ سَعَةً وَأَتَيْتَ أَهْلًا فَاسْتَأْنِسْ وَلَا تَسْتَوْحِشْ