اَلْخَمْطُ [el-hamt] (hâ’nın fethi ve mîm’in sükûnuyla) Bir cins misvâk ağacıdır ki onun ekle kâbil meyvesi olur. Ve Bârî ta’âlânın ﴿ذَوَاتَيْ أُكُلٍ خَمْطٍ﴾ (سبأ 16) dediği kavli أَكْلٌ [ekl]in خَمْطٌ [hamt]a izâfetiyle dahi kırâ’at olundu. Ve خَمْطٌ [hamt] Şol süte derler ki ekşi ola. Ebû 'Ubeyd eyitti: Eger sütten tâzelik halâveti gidip ta’mı mütegayyir olmazsa ona سَاقِطٌ [sâkit] derler ve eger fi’l-cümle râyihası mütegayyir olursa خَامِطٌ [hâmit] ve خَمِيطٌ [hamît] derler. Ve eger ta’mı mütebeddil olursa مُمَحَّلٌ [mumahhal] derler hâ-i mühmelenin fethi ve teşdîdiyle ve eger ta’mı mütebeddil olduktan sonra fi’l-cümle halâveti olursa قُوهَةٌ [kûhet] derler kâf’ın zammı ile.