اَلرِّوَاقُ [er-rivâk] (كِتَابٌ [kitâb] vezninde) ve اَلرُّوَاقُ [er-ruvâk] (غُرَابٌ [gurâb] vezninde) Kıl oba şeklinde 'Arab evine denir. Yâhûd ev önündeki sakfa ya’nî papuçluk ta’bîr olunan boş yerin üzerine mebnî olan şîrvân makûlesine denir. Bu münâsebetle hâlen bu diyâr büyûtunda merdiven başlarının üzerlerinde binâ kılınan nişîmen ve şeh-nişîn misilli cây-gâhlara da ıtlâk olunur; tekûlu: رَأَيْتُهُ يَقْعُدُ فِي الرِّوَاقِ وَالرُّوَاقِ وَهُوَ بَيْتٌ كَالْفُسْطَاطِ أَوْ سَقْفٌ فِي مُقَدَّمِ الْبَيْتِ Mukaddimetu’l-Edeb’de “mukaddemu’l-beyt, pây-gâh-ı hâne” ile müfesserdir ki evin önü ya’nî papuçluk dedikleri yeri olacaktır. Ve رِوَاقُ الْبَيْتِ [rivâku’l-beyt] رَوْقٌ [revk] gibi 'Arab çadırlarının üst şukkasından aşağıca olan şukkasına denir. Şârih der ki Mugrib’de كِسَاءٌ مُرْسَلٌ عَلَى مُقَدَّمِ الْبَيْتِ مِنْ أَعْلاَهُ إِلَى الْأَرْضِ وَيُقَالُ رَوْقٌ الْبَيْتِ وَرِوَاقُهُ أَيْ مُقَدَّمُهُ 'ibâretiyle mersûm olmakla ona göre 'Arab evinin yukarıdan yere kadar salıverilen perdeden ve kezâlik evin papuçluk ta’bîr olunan hâlî mahallinden ‘ibâret olur. Ve o perdenin verâsı başka bir hazîne çadırı gibi mahal olur. Ve hâlen Mısır’da Câmi’-i Ezher’de رِوَاقٌ [rivâk] dedikleri nişîmen ma’nâ-yı evveldendir. Ve رُوَاقُ الْعَيْنِ [ruvâku’l-'ayn] kaşa ıtlâk olunur; yukâlu: هِيَ زَجَّاءُ وَرُوَاقُ الْعَيْنِ أَيِ الْحَاجِبُ Ve رُوَاقُ اللَّيْلِ [ruvâku’l-leyl] gecenin evvel ucuna ıtlâk olunur; yukâlu: رُوَاقُ اللَّيْلِ أَيْ مُقَدَّمُهُ وَجَانِبُهُ Ve رُوَاقٌ [ruvâk] lafzının cem’i أَرْوِقَةٌ [ervikat] gelir, أَشْرِبَةٌ [eşribet] gibi ve رُوقٌ [rûk] gelir, râ’nın zammıyla. Ve رُوَاقٌ [ruvâk] Boynuzlu dişi koyuna denir, نَعْجَةٌ رَوْقَاءُ ma’nâsına. Burada ba’zı nüsha müşevveştir, sahîh olan وَمِنَ اللَّيْلِ مُقَدَّمُهُ وَجَانِبُهُ وَالنَّعْجَةُ الرَّوْقَاءُ 'unvânında olmaktır, niteki öylece terceme olundu.