اَلْمُخَالَطَةُ [el-muhâletat] (مُفَاعَلَةٌ [mufâ’alet] vezninde) ve اَلْخِلاَطُ [el-hilât] (جِدَالٌ [cidâl] vezninde) Bir nesne âher nesneye karışmak ma’nâsınadır; yukâlu: خَالَطَهُ مُخَالَطَةً وَخِلاَطًا إِذَا مَازَجَهُ Şârihin beyânı üzere müte’addî dahi olur. Ve خِلاَطٌ [hilât] Nâsın ve deve ve sâ’ir mevâşînin birbirine karış muruş olmalarından 'ibârettir; yukâlu: مَا هَذَا الْخِلاَطُ أَيِ اخْتِلاَطُ الْإِبِلِ وَالنَّاسِ وَالْمَوَاشِي Ve aygır dişiye aşmak ma’nâsına müsta’meldir; yukâlu: خَالَطَ الْفَحْلُ النَّاقَةَ إِذَا ضَارَبَهَا Ve bir adamın dimâgı muhtell olup 'akl ve şu’ûru şûrîde olmak ma’nâsına müsta’meldir; yukâlu: خُولِطَ الرَّجُلُ فِي عَقْلِهِ إِذَا اخْتَلَّ

اَلْخِلَاطُ [el-hilât] (hâ’nın kesriyle) Bi-ma’nâhu. Ve hadîs-i şerîfte “لَا خِلَاطَ وَلَا وِرَاطَ” vâki’ olmuştur; لَا يُجْمَعُ بَيْنَ مُتَفَرِّقٍ وَلَا يُفَرَّقُ بَيْنَ مُجْتَمِعٍ خَشْيَةَ الصَّدَقَةِ ma’nâsınadır. Ve خِلَاطٌ [hilât] Bir kimsenin 'aklına halel gelmeğe dahı derler; yukâlu: خُولِطَ الرَّجُلُ فِي عَقْلِهِ خِلَاطًا