اَلْخَيْمَةُ [el-haymet] (hâ’nın fethiyle) أَبَانَيْنِ [Ebâneyn] dedikleri dağların üst tarafında bir tepenin ismidir. Ve خَيْمَةٌ [haymet] Büyût-ı a’râbdan müstedîr olan beyte denir ki çadır ta’bîr olunur. Ve ba’zılar dedi ki üç yâhûd dört 'amûd üzere tertîb olunup üzerine ثُمَامٌ [sumâm] dedikleri otlukla örttükleri beyttir ki harâret-i havâdan onda müstazill olurlar yâhûd mutlakan ağaç dallarından tertîb ettikleri beyte denir ki Türkîde bunlar salaş ta’bîr olunur, hulâsâsı a’râb tâ’ifesi kıldan müdevver kubbe tarzında ittihâz ederlerve ba’zen müstatîl olur. Ve deriden dahi düzerler, lisânımızda bunlara çadır ta’bîr olunur. Ve ağaçtan çattıklarına Türkmen lisânında alaçık ta’bîr olunurve sâzlıktan yaptıklarına huğ ta’bîr olunur. Ve hâlen müte’âref olan çadırlar muhdestir, otak ve şemsiyye ve kubbe ve aylak çadırları gibi, gûnâgûnu ihdâs olunmuştur. Ve خَيْمَةٌ [haymet]in cem’i خَيَمَاتٌ [hayemât] gelir fetehâtla ve خِيَامٌ [hiyâm] gelir hâ’nın kesriyle ve خَيْمٌ [haym] gelir hâ’nın fethi ve yâ’nın sükûnuyla ve خِيَمٌ [hiyem] gelir, عِنَبٌ ['ineb] vezninde.