اَلْحَنْظَلُ [el-hanzal] (جَعْفَرٌ [ca’fer] vezninde) Ma’lûmdur ki ebû cehl karpuzuna denir. Efdalı sarı nev’idir, ekserî müsta’mel olan şahmıdır. Mefâsıla munsabb olan balgam-ı galîzi şürbü yâ ihtikânı müshil ve mâlîhûlyâ ve sar’ ve efkâr-ı fâside ve dâ’u’s-sa’leb ve cüzâm 'illetlerine nâfi’, kezâlik şahmı husûsan kökü yılan ve ‘akreb soktuğuna müfîd ve dânesiyle buhûru veca’-ı dendâna ve matbûhunu hâneye serpmek ihlâk-ı berâgîste mü’essir ve yeşilini delk 'ırku’n-nesâ 'illetine 'azîmü’l-menâfi’dir. Ve nebâtında münferiden nâbit olanı kattâldir. Ve حَنْظَلٌ [hanzal] Esâmîdendir: hanzal b. husayn ashâbdandır. Ve hanzale on dört sahâbenin ismidir ve beş nefer muhaddis adıdır. Ve hanzale b. Mâlik, kabîle-i Temîm’de e’azz u ekrem-i kabîledir ki dûdmânına أَكْرَمُونَ [Ekremûn] ıtlâk ederler.