اَلْغَيْبُ [el-gayb] (bi’l-fethi) ve اَلْغَيْبَةُ [el-gaybet] (kezâlik bi’l-fethi) ve اَلْغَيَابُ [el-gayâb] ve اَلْغُيُوبُ [el-guyûb] (bi-fethi’l-gayni fi’l-evveli ve zammihâ fi’s-sânî) ve اَلْمَغِيبُ [el-magîb] (bi-fethi’l-mîm ve kesri’l-gayn) Gâyib olmak; tekûlu: غَابَ عَنْهُ غَيْبًا وَغَيْبَةً وَغَيَابًا وَغُيُوبًا وَمَغِيبًا Ve gün dolunmak ma’nâsına da isti’mâl olunur; yukâlu: غَابَتِ الشَّمْسُ أَيْ غَرَبَتْ Ve غَيْبٌ [gayb] Düz yere dahi derler, arz-ı mutma’inne ma’nâsına. Ve اَلْغُيَّبُ [el-guyyeb] (gayn’ın zammı ve yâ’nın fethi ve teşdîdiyle) ve اَلْغُيَّابُ [el-guyyâb] (gayn’ın zammı ve yâ’nın teşdîdiyle) ve اَلْغَيَبُ [el-gayeb] (fethateynle) غَائِبٌ [gâ’ib]in cem’i. Ve yâ elife kalb olunmadı yâ müteharrik olup mâ-kabli meftûh iken, zîrâ غَيَبٌ [gayeb] صَيَدٌ [sayed]e teşbîh olunmuştur ki صَيَدٌ [sayed] masdardır بَعِيرٌ أَصْيَدُ den me’hûzdur. Ve masdarda kalb olunmadığı asla delâlet eylesin içindir. Ve egerçi غَيَبٌ [gayeb] cem’ ve صَيَدٌ [sayed] masdardır velâkin câ’izdir ki غَيَبٌ [gayeb]le dahi masdar niyyet oluna. Ve أَصْيَدُ [asyed] şol deveye derler ki başın sağına ve soluna tahrîk edemeye li-marazin. Ve bu sebebden أَصْيَدُ [asyed] melike dahi ıtlâk olunur, kibrinden ötürü sağa ve sola iltifât etmediği için.