اَلْغَنَمُ [el-ganem] (fethateynle) Koyun cinsine mevzû’ ismdir. Ve mü’ennestir, lafzından müfredi yoktur, شَاةٌ [şât] müfredidir, zükûr ve inâstan her birine ve muhtelit olduklarında mecmû’una ıtlâk olunur; cem’i أَغْنَامٌ [agnâm] ve غُنُومٌ [gunûm] ve أَغَانِمُ [egânim] gelir. Ve tesniye kılınıp غَنَمَانِ [ganemân] denir iki sürü irâdesiyle; yukâlu: رَاحَ عَلَى فُلَانٍ غَنَمَانِ أَيْ قَطِيعَانِ Şârih der ki غَنَمٌ [ganem] lafzının musaggarı غُنَيْمَةٌ [guneymet]tir, zîrâ şol esmâ-i cümû’ ki lafzından vâhidi olmayıp ve insândan gayrı için ola lâ-cereme ona te’nîs lâzımdır. Ve غَنَمٌ [ganem] غَنِيمَةٌ [ganîmet]ten me’hûzdur, âlet-i difâ’ı olmayıp ve zâtında sehl ve râm hayvân olmakla gûyâ ki cümleye ganîmet olur. Ve bu ism-i 'ayn olmakla masdardan ahzı hilâf-ı meşhûrdur.