بُسٌّ [Buss] (bâ’nın zammı ve sîn’in teşdîdiyle) zâtu ‘İrk nâm mahalde bir dağın adıdır. Ve Benû Nasr b. Mu’âviye’ye mahsûs bir arzın ismidir. Ve gatafân kabîlesine mahsûs bir beyt ismidir ki Ka’be’ye nazîr olmak için binâ eylediler. Kabîle-i mezbûre ahâlîsinden zâlim b. Es’ad nâm kimse kureyş’in Ka’be-i mükerreme’yi tavâf ve Safâ ve Merve beynini sa’y ettiklerini göricek Ka’be’nin tûl ve ‘arzını ba’de’l-misâha Safâ ve Merve’den birer hacer alıp rücû’ eyledi. Kabîlesine geldikte o misâha üzere bir beyt binâ ve Safâ ve Merve nâmıyla o iki haceri vaz’ eyleyip min-ba’d kabîlesi ahâlîsi Ka’be’ye gitmeyip beyt-i mezbûru tavâf eder oldular. Zuheyr b. Cenâb el-Kelbî nâm kimse, mezbûrun bu vaz’ına tahammül edemeyip bir gün 'ale’l-gaflet şeb-hûn ve kendisini katl ve beyt-i mersûmu hedm eyledi.