عَسَلُ اللُّبْنَى [‘aselu’l-lubnâ] (كَسَلُ الْكُبْرَى [keselu’l-kubrâ] vezninde) Buhûr envâ’ından bir nev’ tîb ismidir ki bir cins şecerden bi-nefsihi seyelân eder, hoş-bûy olmakla halk onunla tebahhur ederler, 'âmme tahrîfle حَصَى لُبَانٍ derler. Bu mî’a-i sâ’ile olacaktır ki halk حَصَى لُبَانٍ [hasâ lubân]ı dahi tahrîf edip 'asel-bend buhûru derler ve ba’zı diyârda ona zığla derler. Ve عَسَلُ الرِّمْثِ ['aselu’r-rims] (râ’nın kesriyle) رِمْثٌ [rims] dedikleri nebâttan peydâ olan lüzûcetli ak şıradır ki gümüş koza şeklinde zuhûr eder. Mü’ellif دُهْنُ الْعَسَلِ [duhnu’l-'asel] dedikleri dârûyu ihmâl eyledi, zâhiren müvelled olduğuna mebnîdir. Ve دُهْنُ الْعَسَلِ [duhnu’l-‘asel] Yûnânîde urmali ve beyne’l-etibbâ’ dühn-i Dâvûd dedikleridir ki Türkîde Dâvûd peygamber yağı ve Bulgar yağı ta’bîr olunur.