اَلسَّلْطُ [es-selt] (sîn’in fethi ve lâm’ın sükûnuyla) ve اَلسَّلِيطُ [es-selît] (أَمِيرٌ [emîr] vezninde) Şedîd nesneye denir; yukâlu: رَجُلٌ وَحَافِرٌ سَلْطٌ وَسَلِيطٌ أَيْ شَدِيدٌ Ve bed ve dürüşt kelâmla kulûb-ı nâsı âzürde eden lisâna ıtlâk olunur; yukâlu: لِسَانُهُ سَلْطٌ وَسَلِيطٌ أَيْ طَوِيلٌ Ve dili uzun ya’nî bed ve nâ-sezâ sözler ile nâsı rencîde eden kimseye ıtlâk olunur ki zebân-dırâz ta’bîr olunur; yukâlu: رَجُلٌ سَلْطٌ وَسَلِيطٌ أَيِ الطَّوِيلُ اللِّسَانِ Ve سَلِيطٌ [selît] Zeytûn yağına denir. Ve hubûbâttan sıkılan yağa denir, şırlagan gibi. Lisânımızda salata ta’bîr ettiklerimiz سَلِيطَةٌ [selîtat] muharrefidir; yağ ile ma’mûl olduğu için ıtlâk olunmuştur. Ve fasîh ve ceriyyü’l-lisân adama ıtlâk olunur. Ve bu vasf-ı ricâlde medîha ve nisvânda zemîmedir; yukâlu: رَجُلٌ سَلِيطٌ أَيْ فَصِيحٌ وَامْرَأَةٌ سَلِيطَةٌ أَيِ الْحَدِيدَةُ اللِّسَانِ Ve سَلِيطٌ [selît] Mutlakan tîz ve hadîd şey’e ıtlâk olunur; yukâlu: شَيْءٌ سَلِيطٌ أَيْ حَدِيدٌ Ve bir recülün ismidir. Ve bir kabîle pederinin ismidir.