اَلْإِنْبِتَالُ [el-inbitâl] (إِنْفِعَالٌ [infi’âl] vezninde) ve اَلتَّبَتُّلُ [et-tebettul] (تَفَعُّلٌ [tefa’’ul] vezninde) Kesilmek ma’nâsınadır; yukâlu: بَتَّلَهُ فَانْبَتَلَ وَتَبَتَّلَ أَيْ قَطَعَهُ فَانْقَطَعَ وَتَقَطَّعَ Ve hurmâ fidanı بَتُولٌ [betûl] olmak ma’nâsınadır, ke-mâ se-yuzkeru; yukâlu: إِنْبَتَلَتِ الْفَسِيلَةُ وَتَبَتَّلَتْ إِذَا صَارَتْ بَتُولًا Ve تَبَتُّلٌ إِلَى اللهِ [tebettul ilallâh] mâ-sivâdan kesilip vech-i ihlâsla Hakk’a teveccüh ve ‘ubûdiyyet eylemek, ‘alâ-kavlin nikâh ve tezevvücü terk edip zehâdet eylemek ma’nâsınadır; yukâlu: تَبَتَّلَ إِلَى اللهِ وَبَتَّلَ إِذَا انْقَطَعَ وَأَخْلَصَ أَوْ تَرَكَ النِّكَاحَ وَزَهِدَ فِيهِ Mü’ellif işbu âyet-i kerîmeye işâret eylemiştir:﴿وَتَبَتَّلْ إِلَى اللهِ تَبْتِيلًا﴾ Bu âyette ihtibâk san’atı vardır. Ve تَبَتَّلْ تَبَتُّلًا ve بَتِّلْ نَفْسَكَ تَبْتِيلًا sebkindedir, bi’l-külliyye dergâh-ı Hazret-i Hakk’a munkatı’ ve müteveccih olup dâ’imâ nefsini mâ-sivâdan kat’ ve tecrîd üzere olmağı mutazammındır. Ve تَبْتِيلٌ [tebtîl] dahi تَبَتُّلٌ [tebettul] ma’nâsına da olmakla ri’âyet-i fevâsıl ve tefennün ve dakîka-i mezkûre nüktelerine de mebnî olur. Ve bu Sîbeveyhi mezhebidir.