اَلشَّرَقُ [eş-şerak] (fethateynle) Koyunun kulağı uzunluğuna yarılmak ma’nâsınadır; yukâlu: شَرِقَتِ الشَّاةُ شَرَقًا مِنَ الْبَابِ الرَّابِعِ إِذَا انْشَقَّتْ أُذُنُهَا طُولاً Ve boğaza tükürük tıkanıp durmak ma’nâsınadır; yukâlu: شَرِقَ الرَّجُلُ بِرِيقِهِ إِذَا غُصَّ Ve göze kan oturup kıpkızıl olmak ma’nâsınadır; yukâlu: شَرِقَ الدَّمُ فِي عَيْنِهِ إِذَا احْمَرَّتْ Ve güneşin pertevi gubâr makûlesi 'ârıza sebebiyle za’îf olmak, 'alâ-kavlin güneş salınıp batmağa gelip çatmak ma’nâsınadır; yukâlu: شَرِقَتِ الشَّمْسُ إِذَا ضَعُفَ ضَوْءُهَا أَوْ دَنَتْ لِلْغُرُوبِ Ve fi’l-hadîs: وَقَدْ أَضَافَهُ عَلَيْهِ الصَّلاَةُ وَالسَّلاَمُ إِلَى الْمَوْتَى فَقَالَ “لَعَلَّكُمْ سَتُدْرِكُونَ أَقْوَامًا يُؤَخِّرُونَ الصَّلاَةَ إلى شَرَقِ الْمَوْتَى” Burada murâd ikindi namâzıdır, ya’nî namâzı güneşin hîtân ve cudrân-ı medîne üzerinden sıyrılıp makbereler üzere düştüğü vakte kadar ki gurûba lem’a-i yesîre kalmış olurlar, te’hîr ederler. Pes izâfet ednâ mülâbese için olur. Ve ba’zılar cum’a namazıyla beyân eylemeleriyle yüksek dağlardan sıyrılıp nüzûl ve mekâbir üzere düşünce kadar demek olur ki ikindi vakti hulûl eder. Ve 'inde’l-ba’z burada شَرَقٌ [şerak] lafzı boğaza nesne tıkanmak ma’nâsınadır ki nefesin insidâd ve inkıtâ’ını müstelzimdir. Pes hâsıl-ı ma’nâ, kendi rîki boğazına tıkanmakla ölümcül adamın nefesinden ramak-ı yesîr kaldığı gibi güneşin pertevinden dahi öylece lem’a-i yesîre kalınca kadar te’hîr ederler demek olur, buna göre de murâd ikindi namâzıdır.