اَلْخَلِيَّةُ [el-haliyyet] (غَنِيَّةٌ [ganiyyet] vezninde) Bu dahi arı kovanına denir yâhûd çamurdan düzülmüş رَاقُودٌ [râkûd] şeklinde nesneye denir ki Türkîde petek ta’bîr olunur, onda dahi arı kısmı îvâ eder yâhûd ağaçtan oyma olanına denir yâhûd خَزَمَةٌ [hazemet] dedikleri şecerin omça tarafına denir ki bi-'aynihi râkûd şeklinde ve içi özsüz kavuk olmakla onda arılar yuva edip bal yaparlar; bunların mecmû’u kovan olacaktır. Ve خَلِيَّةٌ [haliyyet] Hemân sütünü sağmak için isti’mâlden tahliye olunmuş nâkaya denir yâhûd sâ’ir köşeğine yakılmış nâkaya denir yâhûd veledinden mehcûr olmakla sâ’irin veledine yakılıp lâkin emzirmeyerek sütü sağılan nâkaya denir yâhûd şol nâkaya denir ki yavru doğurup kendisi pek soyu pâk olmakla sütü firâvân olduğundan altından veledi alınıp sâ’ir nâkaya nakl ve kendisi hemân sağmal olarak terk ve ihlâ oluna yâhud şol nâkaya denir ki iki yâhûd üç nâka ile veled-i vâhide yakılıp o sebeble sütü idrâr edip lâkin veledi onların yalnız birisi emzirmekle sâhib-i hâne dîgerlerini sağmak için teferrug edeler. Ve ayağının bağı boşandırılıp salıverilmiş nâkaya denir. Ve büyük gemiye denir ki kalyon ta’bîr olunur, 'alâ-kavlin mellâhların sun’u olmayarak bi-re’sihi yürüyen gemiye denir yâhûd ardında yedek sandalı olan gemiye denir. Ve خَلِيَّةٌ [haliyyet] Talâk-ı mer’etten kinâye olur, ya’nî elfâz-ı kinâ’iyyedendir, zevc zevcesine أَنْتِ خَلِيَّةٌ deyip ve onunla talâka niyyet eylese mutallaka olur.