اَلنُّقْرَةُ [en-nukret] (غُرْفَةٌ [gurfet] vezninde) ve اَلنِّقْرُ [en-nikr] (nûn’un kesriyle) ve اَلْأُنْقُورُ [el-unkûr] (أُسْلُوبٌ [uslûb] vezninde) Bunlar da hurmâ çekirdeğinin zahrında olan yive denir ki fidan ondan nâbit olur. Ve نُقْرَةٌ [nukret] Yerde olur değirmi halkî oyma çukura denir ki onda su irkilir ve ba’zı kayalarda dahi olur. Cem’i نُقَرٌ [nukar] gelir, صُرَدٌ [surad] vezninde ve نِقَارٌ [nikâr] gelir, nûn’un kesriyle. Ve نُقْرَةٌ [nukret] Kafâ çukuruna denir. Ve eritilmiş altın ve gümüş pâresine denir; cem’i نِقَارٌ [nikâr]dır nûn’un kesriyle. Ve hâne-i çeşme denir, وَقْبُ الْعَيْنِ [vakbu’l-'ayn] ma’nâsına. Ve göt deliğine denir, ثَقْبُ الْإِسْتِ [sakbu’l-ist] ma’nâsına. Ve kuş yumurtlayacak çukura denir.