اَلْعِتْرُ [el-'itr] (‘ayn’ın kesriyle) Asl ve bünyâd ma’nâsınadır; yukâlu: هُوَ كَرِيمُ الْعِتْرِ أَيِ الْأَصْلِ Ve bir nev’ nebât, 'alâ-kavlin bir gûne hurde şecer ismidir. Bunu ba’zılar عَرْفَجٌ ['arfec] ile ve ba’zılar çiğdem çiçeği ile beyân ederler. Ve عِتْرٌ ['itr] Kâfirlerin pereştiş eyledikleri puta denir, صَنَمٌ [sanem] ma’nâsına. Ve mutlakan zebh olunacak hayvâna denir. Ve şol koyuna denir ki Câhiliyyet’te müşrikûn-ı 'Arab perestiş eyledikleri asnâm için kurbân ederler idi. Şârih şehr-i recebe tahsîs eylemiştir. Ve عِتْرٌ ['İtr] Bir kabîle adıdır ki pederleri 'İtr b. Cuşem nâm kimse idi; ashâbdan 'Abdurrahmân b. 'Udeys el-'İtrî ondandır. Ve 'İtr b. Mu’âz, Hevâzin kabîlesinden bir batn adıdır. Sinân b. Muzâhir ve Muhammed b. Mûsâ ve Bekkâr b. Sellâm ve Melik b. damre et-Tâbi’î ve Ebân ve kâsim ibnâ Erkam el-'İtriyyûn ki muhaddislerdir, batn-ı merkûm ricâlindendir. Ve Suleym b. 'İtr et-Tucîbî, Mısır kâdîsi idi ki rüvâttandır. Ve muhaddisînden Fudayl b. Merzûk, Benû 'İtr mevâlîsindendir. Ve عِتْرٌ ['itr] Bel ve tırpan ve balta makûlesinin sapına denir, ‘alâ-kavlin bel demirinin üzerinde olan arkuru ağaca denir ki bel ile yeri söken kimse ayağını ona vaz’ ile zor ederler. Ve hezeyân ma’nâsınadır; yukâlu: أَتَى بِالْعِتْرِ أَيِ الْهَذَيَانِ