اَلْهَجِيرُ [el-hecîr] (أَمِيرٌ [emîr] vezninde) ve اَلْهَجِيرَةُ [el-hecîret] (سَفِينَةٌ [sefînet] vezninde) ve اَلْهَاجِرَةُ [el-hâciret] Zevâl-i şems vaktinde zuhr ile bile nısf-ı nehâr zamânına, 'alâ-kavlin şemsin zevâlinden 'asra kadar zamâna ıtlâk olunur, zîrâ nâs o vaktte şiddet-i harâretten hânelerinde ârâm eylemekle gûyâ ki birbirinden hicret eylediler. ‘İnde’l-ba’z pek ıssı olan nısf-ı nehâr vaktine denir ki ıstılâhımızda öğle sıcağı ta’bîr olunur. Ve هَجِيرٌ [hecîr] (أَمِيرٌ [emîr] vezninde) Büyük ve vâsi’ olan havuza denir; cem’i هُجُرٌ [hucur]dur zammeteynle. Ve kurumuş olan şûr otluğa denir. Ve gövdesi galîz olan yaban eşeğine denir. Ve büyük çanağa denir. Ve هَجِيرٌ [hecîr] Kûfe ile Basra beyninde Benû 'İcl cemâ’ati yurdunda bir su adıdır. Ve şol semiz erkek deveye denir ki dişiye çok aşmaktan bıkagan ola. Ve pek koyu süte denir.