سُرَّقٌ [Surrak] (سُكَّرٌ [sukker] vezninde) Sincâr’da bir mevzi’dir. Ve Ehvâz eyâletinde bir vilâyet adıdır. Ve Surrak b. Esed el-Cuhenî ashâbdandır. Asl ismi hubâb idi. Bir gün bir bedevî ‘Arabdan iki deve iştirâ edip pahalarını edâ eylemek için bâyi’le berâber çekip bir hânenin kapısına getirdi. Bâyi’i kapıda koyıp kendisi akçe çıkarayım diye develeri çekip içeri götürdü. Meğer o hâne iki kapılı olmakla dîger kapıdan develeri kendi hânesine uçurdu. Beri tarafta bîçâre bedevî vâfir zamân muntazır olduktan sonra içeriye dâhil olup keyfiyyet-i hâle muttali’ oldukta dîvân-ı risâlet-'unvân-ı hazret-i peygamberîye 'arz-ı hâl eyledi. Ber-mûceb-i emr-i 'âlî hubâb ihzâr olunup أَنْتَ سُرَّقٌ 'unvânıyla hitâb buyurulmakla min-ba’d سُرَّقٌ ile müştehir oldu. Ve kendileri onunla teberrük ve ibtihâc eder idi. Ve Ahmed b. Surrak el-Mervezî ehl-i siyer ü tevârîhtendir.