اَلْعَدَدُ [el-'aded] (fethateynle) ve اَلْعَدِيدُ [el-'adîd] (نَدِيدٌ [nedîd] vezninde) Ondan ismlerdir, sayı demektir, Fârisîde şümâr denir. Ve عَدَدٌ ['aded] Sayılmış nesneye denir, مَعْدُودٌ [ma’dûd] ma’nâsına ki fa’al bi-ma’nâ mef’ûldür. Ve عَدَدٌ ['aded] İnsânın sinîn-i 'ömrüne ıtlâk olunur ki 'add olunur. Şârih der ki bir hatun civânlıkta ülfet eylediği bir adamı ba’de-zamânin gördükte, “Hani o evvelki şebâb ve celâdetin nice oldu?” diye su’âl eylemekle şahs-ı mezbûr: “مَنْ طَالَ أَمَدُهُ وَكَثُرَ وَلَدُهُ وَرَقَّ عَدَدُهُ ذَهَبَ جَلَدُهُ” kelâmıyla cevâb vermiştir. Ve عَدِيدٌ [‘adîd] قِرْنٌ [kirn] ma’nâsına müsta’meldir ki bir adamın küf’ ve hemtâsına denir. Ve عَدِيدُ الْقَوْمِ ['adîdu’l-kavm] o kavmin 'aşîretinden olmayıp lâkin onlardan ma’dûd olan ecnebiyyü’l-asl kimseye denir; yukâlu: فُلاَنٌ عَدِيدُ الْقَوْمِ أَيْ يُعَدُّ فِيهِمْ وَلَيْسَ مِنْهُمْ Ve yay kirişinin tıngırtısına denir. Ve 'Umeyre kabîlesine mahsûs bir su adıdır.