اَلْعَرْجُ [el-'Arc] (‘ayn’ın fethi ve râ’nın sükûnuyla) Yemen’de bir belde adıdır. Ve Huzeyl kabîlesi diyârında bir mevzi’ adıdır. Ve tarîk-i Mekke’de bir menzil adıdır; 'Abdullâh b. 'Amr b. 'Osmân b. 'Affân el-'Arcî eş-Şâ’ir oradandır. Mü’ellif bu mâddeyi وَبِالْفَتْحِ 'unvânıyla resm eylemekle 'âdeti üzere evvelin fethi ve sânînin sükûnuyla takyîd olundu, zîrâ dîbâcede beyân olunduğu üzere بِالْفَتْحِ dedikte murâd resm-i mezbûrdur ve بِالْكَسْرِ dedikte evvelin kesri ve sânînin sükûnuyladır ve بِالضَّمِّ dedikte evvelin zammı ve sânînin sükûnuyladır ve بِالتَّحْرِيكِ dedikte fethateynle yâhûd fetehâtladır; ba’zı hâmişte bî-vech i’tirâz nâ-becâdır. Ve عَرْجٌ ['arc] Deve sürüsüne denir ki seksen kadar, 'alâ-kavlin seksenden doksana kadar yâhûd yüz elli ve ondan yukarıca yâhûd beş yüz bine kadar ola. Ve bu ma’nâda 'ayn’ın kesriyle lügattir. Cem’i أَعْرَاجٌ [a’râc] gelir ve عُرُوجٌ ['urûc] gelir.