اَلْعَظَمَةُ [el-'azamet] (fetehâtla) ve اَلْعُظَّامَةُ [el-'uzzâmet] (رُمَّانَةٌ [rummânet] vezninde) ve اَلْعَظَمُوتُ [el-'azamût] (جَبَرُوتٌ [ceberût] vezninde) Sîga-i mübâlagalardır, kibr ve nahvet ve zehv ma’nâsınadır; lâkin 'azamet-i Bârî-i zü’l-Celâl vasf-ı mezkûr ile sıfatlanmak câ’iz değildir. Ve bununla kaçan 'ibâddan birisi vasflansa hakkında kadh ve zemîmedir, zîra murâd kibr ve tecebbürdür ki sıfât-ı şeytâniyyedendir ve ammâ 'azamet-i Rabbânî keyf ve hadd ve temsîl havsalasına güncîde değildir, hemân 'azîm olduğunu i’tikâd eylemek vâcibdir. وَاللهُ هُوَ الْعَظِيمُ وَلَهُ الْكِبْرِيَاءُ Ve عَظَمَةُ اللِّسَانِ ['azametu’l-lisân] Dilin kalın olan yerinden 'ibârettir ki ilerisidir. Ve عَظَمَةُ السَّاعِدِ ['azametu’s-sâ’id] Pazının dirsek yanında balık eti olan kaba yerinden 'ibârettir; zîrâ سَاعِدٌ [sâ’id] iki mikdârdır, biri dirsek yanıdır ki balık eti ve sinirli et olan yeridir ve birisi el ayasının ötesidir ki ona أَسَلَةٌ [eselet] derler.